Yangiliklar va voqealar

Markaziy va Sharqiy Yevropada televidenie va raqamli litsenziyalash muammolari

2024-yil 10-11-dekabr kunlari Budapesht shahrida (Vengriya) San’atkor, ijodkor va ijrochilarning mualliflik huquqlarini himoya qilish palatasi vakillari CISAC tomonidan tashkil etilgan “Markaziy va Sharqiy Yevropada televidenie va raqamli litsenziyalash muammolari” yillik seminarida va audiovizual jamiyatlarni rivojlantirish bo‘yicha seminarda ishtirok etishdi. Mazkur tadbirlarda ishtirok etish mualliflar huquqlarini himoya qilish, ijodiy sohani targ‘ib qilish va rivojlantirishda muhim ahamiyatga ega.

Seminar doirasida mualliflik huquqini himoya qilishning so‘nggi rivojlanishlari bilan tanishish, xalqaro ekspert va mutaxassislar bilan tajriba almashish va litsenziyalashning dolzarb masalalarini muhokama qilish uchun qulay imkoniyat yaratdi. Shuningdek, televidenie va radioeshittirishlar doirasida jamoatchilik bilan muloqotga doir bo‘lib o‘tgan keyingi sud ishlari muhokama qilindi.

Seminar bilimlarni kengaytirish, tajriba almashish va mulkiy huquqlarni boshqarish va hamkorlikda yangi vositalarni joriy etishda rivojlanayotgan jamiyatlarga ko‘mak bo‘ladi.

Musiqiy asarlarni yaratish va ulardan foydalanishda mualliflik huquqlariga rioya etish masalalari

2024-yil 16-noyabr kuni “San’atkor, ijodkor va ijrochilarning mualliflik huquqlarini himoya qilish palatasi” va Yunus Rajabiy nomidagi O‘zbek milliy musiqa san’ati instituti bilan hamkorlikda institut professor-o‘qituvchi, doktorant, mustaqil-izlanuvchilari uchun “Musiqiy asarlarni yaratish va ulardan foydalanishda mualliflik huquqlariga rioya etish masalalari” mavzusida seminar bo‘lib o‘tdi. Seminarda bugungi kunda musiqa sohasida mualliflik huquqiga rioya etishning qonunchilik me’yorlari va xalqaro-huquqiy asoslari haqida atroflicha tushuntirishlar berildi. Keyingi paytlarda ijodkorlar va ijrochilar o‘rtasida kelib chiqadigan kelishmovchilar sabalari hamda ularning yechimlari haqida ham fikr yuritildi. O‘quv jarayonida mualliflik huquqiga oid mavzularda suhbatlar o‘tkazib turishga kelishib olindi. 

SIIP IFRRO a’zosi bo‘ldi

San’atkor, ijodkor va ijrochilarning mualliflik huquqlarini himoya qilish palatasi (SIIP) Xalqaro takror ishlab chiqarish huquqlari tashkilotlari federatsiyasi (IFRRO)ga a’zo bo‘lganini mamnuniyat bilan ma’lum qilamiz! Bu xalqaro maydonda mualliflar va noshirlar huquqlarini himoya qilish yo‘lida qo‘yilgan muhim qadamdir. IFRRO mustaqil, xalqaro notijorat birlashma bo‘lib, matn va grafika asarlarini ko‘paytirish huquqlarini jamoaviy boshqarishni faol targ‘ib qiladi.

Endi a’zolik orqali mualliflik huquqi boshqaruvini yanada rivojlantirish va targ‘ib qilish, ijodlardan qonuniy va manfaatli foydalanishni ta’minlash imkoniyatiga ega bo‘lamiz. Bu shuni anglatadiki, har bir muallif va noshir o‘zi munosib e’tirof etiladi va qo‘llab-quvvatlanadi!

Biz mualliflar va noshirlarni Palatamizga a’zo bo‘lishga taklif qilamiz! O‘z ijodingiz namunalarini himoya qiling, huquqlarni boshqarish bo‘yicha ko‘mak oling va qonuniy haq oling.

Sahna asarlaridan qonuniy foydalanish

Madaniyat vazirligi bilan “San’atkor, ijodkor va ijrochilarning mualliflik huquqlarini himoya qilish palatasi” o‘rtasida imzolangan hamkorlik memorandumi doirasida, sahna asarlaridan qonuniy foydalanishni yo‘lga qo‘yish, foydalanilayotgan asarlar repertuar bazasini shakllantirish, asarlardan foydalanganlik uchun huquq egalariga tegishli mualliflik haqi to‘lash tizimini joriy etish maqsadida vazirlik tizimidagi teatrlar rahbarlari va bosh hisobchilari uchun seminar o‘tkazildi.

Seminarda O‘zbekiston Respublikasining mualliflik huquqi va turdosh huquqlar sohasiga oid qo‘shilgan xalqaro hujjatlari, jumladan, “Adabiy va badiiy asarlarni muhofaza qilish haqida”gi Bern konvensiyasi, “Fonogramma tayyorlovchilarning manfaatlarini ularning fonogrammalari noqonuniy takrorlanishidan muhofaza qilish to‘g‘risida”gi Jeneva konvensiyasi, “Jahon intellektual mulk tashkilotining mualliflik huquqi to‘g‘risida”gi shartnomasi va “Jahon intellektual mulk tashkilotining ijrolar va fonogrammalar bo‘yicha shartnomasi” kabi shartnomalarning a’zosi sifatida mualliflar va boshqa huquq egalarining huquq va manfaatlarini xalqaro miqyosda muhofaza qilish bo‘yicha majburiyatlari tushuntirildi.

Shuningdek, O‘zbekiston Respublikasi Vazirlar Mahkamasining 2008-yil 19-yanvardagi “Adabiyot va san’at asarlaridan foydalanganlikning ayrim turlari uchun mualliflik haqining eng kam stavkalari to‘g‘risida”gi 10-son qarori va O‘zbekiston Respublikasi Prezidentining 2017-yil 14-avgustdagi “Madaniyat va san’at tashkilotlari, ijodiy uyushmalar va ommaviy axborot vositalari faoliyatini yanada rivojlantirish, soha xodimlari mehnatini rag‘batlantirish bo‘yicha qo‘shimcha sharoitlar yaratishga doir chora-tadbirlar to‘g‘risida”gi PQ-3201-son qarori bilan mualliflarga va boshqa huquq egalariga mualliflik haqi to‘lash tartiblari haqida tushuntirishlar berildi.

Mualliflik huquqiga rioya etish bo‘yicha davlat-huquqiy siyosatining yo‘nalishlari va sohadagi muammolar yechimlari haqida fikr yuritildi. Zalvorli asarlar yaratish uchun mualliflarga hurmat ko‘rsatish va ularning huquqlarini ro‘yobga chiqarish bilan bog‘liq masalalarga e’tibor qaratildi. Kelgusida ham teatr jamoalari bilan shunday mavzularda seminarlar tashkil etishga kelishib olindi.

Hisobot-saylov konferensiya 2024

2024-yilning 16-avgust kuni soat 15:00 da Madaniyat vazirligi binosida (Amir Temur shoh ko‘chasi, 107B-uy) San’atkor, ijodkor va ijrochilarning mualliflik huquqlarini himoya qilish palatasining navbatdagi hisobot-saylov konferensiyasi o‘tkazilishi rejalashtirilgan.

Konferensiya kun tartibiga quyidagi masalalar kiritilgan:

1. Palataning o‘tgan davr mobaynida amalga oshirgan ishlari to‘g‘risida hisobot (2021-2023 yillar va 2024-yil birinchi yarim yillik).

2. Palata ustaviga o‘zgartirish kiritish.

3. Boshqaruv a’zolarining yangi tarkibini saylash.

4. Boshqaruv raisini saylash.

Konferensiyada ishtirok etish boʻyicha (+99899)-808-15-55 raqamiga murojaat qilish mumkin.

O‘zbekiston teatrlari mualliflik huquqi himoyasida

O‘zbekiston Davlat drama teatri, O‘zbek Milliy akademik drama teatri, O‘zbekiston Yoshlar teatri va Fargʻona viloyat qoʻgʻirchoq teatri o‘z mualliflariga mualliflik haqlarini to‘lash bo‘yicha yetakchi bo‘lib, mualliflik huquqlarini himoya qilish bo‘yicha beqiyos sadoqatini namoyon etmoqda. Bu qadam nafaqat O‘zbekiston qonunchiligiga, balki intellektual mulkning ahamiyatini e’tirof etish bo‘yicha global tendensiyaga ham mos keladi.

 O‘zbekiston Davlat drama teatri va O‘zbek Milliy akademik drama teatri mualliflari teatr sahnasida namoyish etilgan asarlari uchun munosib mukofotga sazovor bo‘ldi. Tez orada O‘zbekiston Yoshlar teatri va Fargʻona viloyat qoʻgʻirchoq teatri mualliflariga ham mualiflik haqlari to’lab beriladi. Barcha taqsimotlar O‘zbekiston qonunchiligiga va teatrlar tomonidan taqdim etilgan hujjatlarga qat’iy rioya qilgan holda, mualliflar huquqlariga rioya etilishini kafolatlagan holda amalga oshiriladi.

 Mualliflik huquqini himoya qilish muhimligini tushunadigan rioya qilayotgan teatrlar ro'yxatiga qo'shiling. Mualliflik huquqlarini hurmat qilish nafaqat ijodkorlarga adolatli haq to‘lanishini ta’minlaydi, balki gullab-yashnayotgan teatr industriyasini qo‘llab-quvvatlaydi va O‘zbekiston madaniy merosini saqlab qoladi.